LAOAG CITY – Dandani a nagpakamatay ti maysa nga agtutubo a residente ti Barangay 12 iti ili ti San Nicolas gapu iti maipagarup a panang-bully kenkuana dagiti sumagmamano a barangay officials.
Daytoy ti inbutaktak ken pakaluksawan unay ti rikna ti ina ti nasao nga agtutubo.
Segun iti maseknan nga ina, dagiti maitudtudo nga opisial ti barangay nga adda iti likudan ti panang-bully iti anakna ket da Barangay Kagawad Allan Acosta, Barangay Kagawad Julius Coloma ken Barangay Chairman Gil Repato.
Inbatadna a basar iti pannakisarsaritana iti mismo nga anakna, ginandat nga agpakamatay ti anakna gapu ta saanna a kabaelan a panunoten ti inaramid dagiti nasao nga opisial ti barangay.
Inlawlawagna nga innala ti maysa a nagpaidasig a Konsehal ti anakna kas Janitor ken agtrabaho iti carwash.
Nupay kasta, inpalgakna a dagiti pagtaltalkan ti nagpaidasig a Konsehal ket baon baonenda ti anakna uray saanen a karaman iti trabahona no sadinno a no saanna a maubra ket gandatenda a dangran.
Mamati isuna a dawdawatenda pay ti kuarta ti anakna gapu ta awan ti naur-urnongna kabayatan ti maysa a bulan a panagtrabahona ken butbutngenda daytoy no saanna a tungpalen ti ibagada.
Mainaig iti daytoy, inpeksa ti nasao nga agtutubo ti sakit ti nakemna kadagiti nasao nga opisial ti barangay.
Inbatadna a napanunotanna ti agtrabaho ken agsardeng iti panagadal gapu ta kayatna ti makatulong kadagiti kakabsatna ken ti inana.
Kabayatanna, inkarigatan ti Bombo Radyo Laoag News Team nga alaen ti takder dagiti maseknan nga opisial ti barangay maipanggep iti nasao a banag ngem saan pay a simmungbat dagitoy.
