LAOAG CITY – Krinitikar ni Israeli Prime Minister Benjamin Netanyahu dagiti sumagmamano a Western countries kabayatan ti panagbitla na iti UN General Assembly gapo iti panangrekognisar da ti Palestinian state.
Inawagan ni Netanyahu ti addang dagiti pagilyan kas “mark of shame.”
Inbatad na a saan da pay a nalipatan ti inaramid ti Hamas a panangraot ken pananghostage kadagiti Israeli iti October 7 attack.
Naamoan nga ita ket adda pay ti 48 nga hostage nga iggem ti Hamas no sadinno 20 kadagitoy ket kumpirmado a sibibiag.
Sakbay ti panagbitlana ket nag-walk out dagiti ado a delegado kas panangipakita da ti protesta iti ar-aramiden ti Israel idinto nga iti ruwar mismo ti nakaangayan ti summit ket adda met ti protesta kangrunaan na iti Times Square.
Nupay kasta, saan a naapektaran ni Netanyahu iti laksid nga ado ti nagwalk-out a delegado.
Mainaig iti daytoy, nangipan ti Israel Defense Forces ti loud speaker iti boundary ti Gaza tapno mangegan ti panagbitla ni Netanyahu.
Sumangsango ita ti Israel iti international pressure gapo iti military action na iti Gaza, nga isu ti nangitunda iti panangrekognisar ti UK, France, Canada, Australia ken dadduma pay a pagilyan ti State of Palestine.
