LAOAG CITY – Inlawlawag ti Philippine Institute of Volcanology and Seismology (Phivolcs) nga awan ti koneksyon iti tunggal maysa dagiti gingined a nangdayyeg iti pagilian iti kallabes ken binallaagan na ti publiko kontra kadagiti peke a “prediction” iti social media.
Inpetteng ni Johnlery Deximo, senior science research specialist ti Philippine Institute of Volcanology and Seismology nga adda ti bukod a fault system dagiti nagsasaruno a gingined iti pagilian.
Inbatad ni Deximo a nupay adda ti nasurok a 180 nga aktibo a fault segment ken innem nga aktibo trench iti pagilian ket awan ti kinapudno na dagiti agwarwaras a damag a maddaa ti magnitude 8 wenno 9 a gingined.
Ginutigot na ti publiko a saan nga agiwaras kadagiti saan a beripikado nga impormasyon a mangitunda laeng ti panagbuteng ken pannakaulaw.
Innayon ni Deximo a ti Pilipinas ket seismically active a pagilian isut gapuna a normal nga adda dagiti panagdayyeg.
Nupay kasta, kuna na a saan a maestablisar no kaano ken no sadinno a lugar ti pakapasamakan ti napigsa a gingined.
