LAOAG CITY – Nabara a napagsasaritaan ti baro a pasagid ni Sen. Imee Marcos kontra ken ni Senador Ping Lacson ken iti “Pink” group.
Iti baro nga inruarna a video, naminsan manen a pinasagidan ni Marcos ti maipagarup nga iregularidad iti flood control projects.
Arig game show met ti atake ti Senadora iti pulitiko a maipagarup a mangrugi iti “P” nga agsukat-sukat ti political alliance, depende iti agenda ken tapno agtalinaed iti bileg.
Pinugtoan pay ni Marcos ti “Political Butterfly” ngem saan daytoy ti sungbat.
Nadakamatna ti “Ping” ngem ti sungbatna ket “Pink.”
Immunan a nagsinnungbat ti dua nga agpanpanday linteg gapu iti komento ti senadora iti proseso ti budget ken hearings.
Nupay kasta, inpetteng ni Lacson, ni Marcos mismo ket addaan ti P2.5 bilyon nga alokasion iti 2025 budget basar iti “Cabral Files” isu nga arig iyaw-awanna laeng ti isyu.
Kabayatanna, kuna si Senate President Tito Sotto nga aramid laeng dagiti akusasion ni Marcos kontra iti panangimaton iti Senado.
