LAOAG CITY – Inpasigurado ni Energy Usec. Rowena Guevara nga awan ti namnamaen a Yellow Alert iti suplay ti koriente iti pagilian inton bulan ti Mayo.
Nupay kasta, inadmitir ni Guevarra a saanda pay a matantsa dagiti planta ti koriente.
Inlawlawagna a masansan a maaddaan ti problema kadagiti planta no sobra ti kinabara ti panawen.
Immunan nga ininspeksion dagiti opisial ti Department of Energy (DOE) ken Energy Regulatory Commission ti major power facilities idiay Batangas.
Daytoy ket kagiddan ti deklarasion ti Yellow Alert iti Luzon Grid idi Abril 16 kalpasan a nag-offline ti sumagmamano a generating units dagiti planta ti koriente.
