LAOAG CITY – Inadmitir ni Presidente Ferdinand Marcos Jr. nga adu pay ti kasapulan nga aramiden tapno maipatungpal dagiti programa a dinakamatna iti State of the Nation Address wenno SONA daytoy.
Inbatad ni Marcos a saan nga agpatingga iti panagbitla ti State of the Nation Address gapu ta masapul a sarunoen daytoy ti konkreto a tignay tapno masolbar dagiti problema dagiti Pilipino.
Karaman kadagiti tuttutukan ti gobierno iti pananglaban iti panagbisin kas ti panangipaay ti bagas kadagiti agkasapulan a pamilia ken feeding programs para kadagiti ubbing nga agad-adal.
Iti sektor ti salun-at, dinakamt ti Presidente ti Yaman ng Kalusugan Program (YAKAP), nayon a tulong para iti dialysis patients ken dagiti addang para iti cancer, HIV/AIDS ken mental health.
Inpetteng ni Marcos ti Zero Balance Billing kadagiti ospital ti Department of Health (DOH) ken panangikkat iti value-added tax iti sumagmamano nga agas.
Innayonna nga agtultuloy a denggen ti gobierno dagiti arungaing ti publiko ken solbaren dagiti problema.
