LAOAG CITY – Naamoan ti impeachment trial a ti sertipikasion para kadagiti confidential activities ti Office of the Vice President (OVP) iti maikatlo a kuarter ti 2023 ket saan a maitunos wenno saan a nakasurot ti Joint Circular 2015-01.
Ti nasao a sertipikasion ket inisyu ni Colonel Raymund Dante Lachica, mangidadaulo ti Vice Presidential Security and Protection Group (VPSPG).
Segun ken ni Commission on Audit-Intelligence and Confidential Funds Audit Office (COA-ICFAO) state auditor Xylene del Campo, ti sertipikasion ket kas mangsuporta iti payment of rewards kadagiti confidential activitied nga inyuswat ti OVP.
Nupay kasta, inpunto ni Del Campo nga awan ti nakitana a nagapuanan wenno resulta a mangpaneknek iti payment of rewards, kas koma no adda natiliwan nga NPA kadagiti mapapati a surveillance activities.
Basar iti Protective Intelligence Operations Reports (PIOR) a linaon ti sertipikasion, dagiti confidential activities ni VP Duterte ket dagiti miting, panagatendar kadagiti commencement exercises, panagmula iti kayo, courtesy visits, coordination meetings ken awards ceremonies kas iti Disiembre 2022 confidential activities no sadinno a saan a maitunos iti pannakausar ti confidential funds.
Innayon ni Del Campo nga agpapada met dagitoy a kompidensial nga aktibidad iti 1st ken 2nd quarters ti 2023.
