LAOAG CITY – Australia ti kaunaan a pagilian a mangipawil iti panagusar ti social media kadagiti agtutubo a saan pay a dimmanon iti tawen a 16.
Inrakurak ni Prime Minister Anthony Albanese a daytoy nga addang ket mangipaay ti nataltalged a rugi iti online world para kadagiti ubbing.
Nangrugi ita nga aldaw, dagiti kangrunaan a social media platforms ket maobligaren a mangipatungpal ti age verification systems.
Naammoan a dagiti kompania nga aglabsing iti linteg ket mabalin nga agmulta ti agingga iti $50 milyon kas pannusa.
Gagem ti baro a pagannurotan a protektaran ti mental health dagiti agtutubo kontra iti cyberbullying, online exploitation ken adiksion iti social media.
Naruay a nagannak ti nangipeksa ti suporta gapu ta nakissayan ti panagamakda iti kinatalged dagiti annakda iti online.
Iti mensahe ni Albanese, inpettengna a daytoy ket maysa a naisangsangayan nga addang a mangikeddeng ti pagalagadan para iti dadduma a pagilian iti digital age.
