LAOAG CITY – Naisayangkat ti search warrant operation iti balay ni Nelson Pascua y Agag, addaan iti umno a tawen, mannalon, ken residente iti Sitio Balbalay iti Barangay Escoda iti ili ti Marcos.
Segun ken ni Police Capt. Johnveil Maramag, ti chief of police iti ili ti Marcos, nailanad iti inserbi da a search warrant nga adda ti ik-ikutan ni Pascua a maysa a kalibre 45 ken kalibre 38 a paltog.
Nupay kasta, inbaga ni Maramag a ti laeng naala da iti balay ni Pascua ket ti maysa a kalibre 45 ken airgun nga adda ti tatak na a kalibre 22.
Inpakaammo ni Maramag nga awan ti ammo da nga aniaman a nakainaigan na a kaso ni Pascua ngem ti nagibasaran da iti panangisayangkat da ti operasyon ket ti monitoring ti Ilocos Norte Police Provincial Office (INPPO) nga adda ti ilemlemmeng na nga illegal items iti balay na.
Innayon ni Maramag nga inadmitir ni Pascua a kukua na amin dagiti naala a paltog iti balay na ken dagitoy ket kasapulan na para iti trabaho na kas CIDG Barangay Intelligence Network.
Iti eksklusibo nga interview ti Bombo Radyo Laoag ken ni Nelson Pascua, inbaga na nga adda ti pagsayaatan ti pannakaisayangkat ti operasyon iti balay na gapu ta napaneknekan nga awan ti ilemlemmeng na nga illegal items.
Innayon na a dagiti nakita dagiti otoridad a maysa a kalibre 45 a paltog, maysa a magazine, 9 a bala ti nasao a paltog, holster nga agmaris ti nangisit, sling bag, bulletproof vest, maysa nga airgun, ken maysa nga oxygen tank ket kompleto amin ti dokumento na.
Nupay kasta, inbaga ni Maramag nga a masapol nga iberipikar da pay laeng a naimbag dagitoy iti Firearms and Explosive Office.
Kabayatanna, negatibo met ti resulta ti naisayangkat a search warrant operation iti balay ni Angel Pascua y Respicio, addaan iti umno a tawen, agpapaay ken residente iti Sitio Balbalay, Barangay Escoda iti nasao nga ili.
Nailanad iti search warrant ti kalibre 45 a paltog ken balbala ti nasao a paltog ngem awan ti nakita dagiti otoridad iti balay ni Angel Pascua.
