LAOAG CITY – Nagsagaba ti sugat dagiti dua manipod kadagiti uppat a nakalugan iti maysa a nangisit a Nissan Terrano kalpasan a napaltu-paltugan da iti provincial road, bisinidad iti Sitio Bantay Lunes, Barangay 21, Libton, Bacarra, Ilocos Norte.
Nabigbig dagiti nasugatan a da Avelino Trinidad, agtawen iti 56, residente iti Barangay 6 ken ni Reynaldo Bagain, agtawen iti 54, residente iti Barangay 21, idinto a saan a naan-ano ti nangiturong ti lugan a ni Nestor Eda, agtawen iti 56, ken ti maysa pay a kadwa da a ni Arsenio Sagabaen, agtawen iti 56, residente iti met laeng nasao nga ili.
Iti imbestigasyon, bayat ti panagdaldalyasat ti dagiti biktima iti lugar ket kellaat lattan nga adda ti nangpaltu-paltog kadakuada.
Agpada a nagsagaba ti sugat iti akin-kannigid nga ima da Trinidad ken Bagain, ken naitaray dagitoy iti Governor Roque Ablan Senior Memorial Hospital (GRASMH) ditoy ciudad ti Laoag.
Narekobre dagiti otoridad iti nakapasamakan ti krimen iti dua a misfired ammunition para ti cal. 5.56, dua a fire cartriges para iti cal 5.56, ken siyam a fired cartriges para ti cal. 30 carbine.
Naamoan a dagiti biktima ket supporters ti agpaidasig a para mayor iti ili ti Bacarra a ni Fritzie Anne Kaye Gapasin y dela Cruz nga anak ni Mayor Nicomedes dela Cruz.
Kabayatanna, mamati ni Mayor Nicomedes dela Cruz iti ili ti Bacarra nga a ti kalaban da iti politika ti adda ti likudan ti pannakatambang dagiti supporters da.
Inpetteng na nga immunan a napaputukan dagiti campaigners na a babbai ken adda pay dagiti us-usaren da a lugan a naikkat ti plaka na.
Inbatad na a nabayagen nga ibagbaga na iti hepe iti ili ti Bacarra ti panagiyuswat da ti checkpoints ken agpatrolya da, ngem saanna nga ammo no ania ti aksyon ti maseknan.
Innayon ti mayor a ti kayat na ket agbalin a nalinak ken naurnus ti maiyuswat nga eleksyon iti nasao nga ili.
