LAOAG CITY – Agragragsak iti agdama ti Labour Party kalpasan ti landslide victory na iti kalepleppas laeng a 2024 snap general election iti United Kingdom.
Gapu iti daytoy, ti lider ti partido a ni Sir Keir Starmer ti agbalin a sumaruno a Prime Minister ti UK.
Inawat met a dagus ni PM Rishi Sunak ti resulta ti eleksyon ken inwaragawag na a mismo ti panangabak kenkuana ti Labour Party iti general election ken tinawagan na pay ni Keir Starmer tapno kablaawan daytoy.
Maibilang met ti pakasaritaan ti panangabak ti Labour Party gapu ta inleppas na ti 14 a tawen a panagturay ti righ-wing government iti babaen ti Conservative party.
Iti panagbitla ni Starmer, a nagserbi kas dati a chief prosecutor ken human rights lawyer, inkari na a ti pagilian da ti prayoridad na ken maikadwa ti partido da.
Inpasingked na pay nga agaramid kadagiti panagbalbaliw ti partido da ken panawenen tapno ipatungpal daytoy.
