LAOAG CITY – Kalikagum ti lokal a gobierno ditoy siudad ti Laoag a maipababa ti kaso ti dengue.
Segun ken ni Mr. James Blas, Rural Sanitation Inspector, dakkel ti akem dagiti tunggal residente wenno pamilia iti pannakaipababa ti nasao a kaso babaen iti panagdaldalus kadagiti mabalin a pagbalayan dagiti lamok a mangitunda ti sakit a dengue.
Inbatadna a masapol pay a makita ken ikkaten dagiti naurnong a danum iti lata, plastik ken ligay a posible nga aggapu iti tudo a mabalin a pagitlogan ti lamok.
Inlawlawagna a maibasar iti datosda manipud idi Enero ket addan ti 20 a kaso ti nairekord ken awan ti pimmusay ditoy siudad ti Laoag.
Mainaig iti daytoy, inpakaammo ni Ms. Melda Jacinto, Dengue Coordinator ditoy siudad, no aggurigor ket dagus nga agpakonsultar iti doktor tapno maammoan a dagus ti pudno a kasasaad ti maysa a pasiente.
Kabayatanna, naipalagip kadagiti amin a residente ti kanayon a panagdaldalus iti aglawlaw pakairamanan iti drainage canal tapno maliklikan a makagat ti lamok nga adda ti dengue-na.
