LAOAG CITY – Nangidiaya ti Department of Agriculture ti Loan Assistance para kadagiti millenials a zero interest ken mabalinda a bayadan daytoy iti uneg ti lima a tawen.
Daytoy ti inpakaammo ni Sec. William Dar kabayatan ti panagbisita na ditoy probinsia.
Segun kenkuana, dagiti millenials nga agtawen ti 18 agingga 30 ket mabalinda ti makipagpaset iti programa ti Department of Agriculture a Capital Access for Young Agripreneurs a nairanta a para kadakuada.
Inbatadna a babaen ti Agricultural Credit Policy Council nga idauloan ni Executive Director Jojo Badeola ket maited ti Loan Assistance kadagiti Credit Institutions para kadagiti millenials.
Inpakaammona a maikkan ti 500,000 a pisos kas loan assistance para kadagiti millenial a mangayat nga agtalon ken agnegosio.
Innayon ni Sec. Dar a ti kayat na a sawen ti programa da ket “Do Farming, Do Agribusiness, Pay later” ken mangnamnama a babaen iti daytoy ket magutigot dagiti millenials a sumrek ken padasen iti farming ken negosio.
