LAOAG CITY – Impasingked ni Mr. Gerovic Chano, Teacher III ken School Disaster Risk Reduction Management Council Coordinator iti Gabu National High School ditoy ciudad ti Laoag a saan da a basura dagiti nakatambak iti sango ti nasao a pagadalan.
Sungbat daytoy Chano kalpasan nga adda dagiti nagreklamo ditoy Bombo Radyo Laoag mainaig kadagiti nakapenpen ken saan a makolkolektar a basura iti sango ti nasao a pagadalan.
Inbatad na a dagiti basurada ket adda iti uneg ti pagadalan ken maurnong dagitoy sakbay nga iruwar da.
Inpakaammo ni Chano a mairuwar laeng dagiti basura ti pagadalan tunggal aldaw ti Lunes gapu ta daytoy ti naituding nga aldaw a pannaka-kolektar dagiti basura iti nasao a lugar.
Mainaig iti daytoy, inbatad ni Brgy. Chairman Rodel Legaspi ti Barangay 34-B Gabu Norte a nabayagen a dukduktalenda no siasino dagiti agibatbati kadagiti basura iti lugar da ngem agpapan ita ket saanda pay a naranaan dagiti akin-aramid.
Atapen ni Legaspi a possible nga adda dagiti agiliblibas a mapan agibati iti rabii wenno parbangon ti Dominggo tapno awan makasipot kadagitoy.
Kunana na a nagkalida payen iti abot a pagikabilan kadagiti basura a nakapenpen iti sango ti nasao a pagadalan gapu ta maiwarwara dagitoy ken nabangsit dan gapu iti kinabayagda.
Innayon na a nagaramid da payen ti plaka a mangipalagip a maipawil ti agibelleng ken agibati ti basura iti nadakamat a lugar ngem awan latta ti nagbaliwan na.
Inlawlawag pay ni Brgy. Chairman Legaspi nga awanen dagiti mapan agkolkolektar kadagiti nakapenpen a basura iti sango ti GNHS gapu ta awan met ti tao a singirenda ti bayad na.
Kabayatanna, nagpanawagan manen ti Kapitan nga ikabil koma iti lugar a naituding a paka-kolektaran dagiti basura tapno awan ti agbalin a problema.
