LAOAG CITY – Impasigurado ni Senate Minority Leader Koko Pimentel nga agtultuloy ti panagdengngegda inton Lunes mainaig iti war on drugs ti dati nga administrasion ni Duterte, tumabuno man wenno saan ni dati a Presidente Rodrigo Duterte iti imbestigasion.
Segun kenni Pimentel, immaterial no agparang wenno saan ni dati a Presidente Duterte ken saan da a masinunuo no nakumpirmaan wenno saan ti itatabuno ti dati a presidente iti hearing.
Kinunana a nasurok a 30 ti naawis iti imbestigasion ti Senate Blue Ribbon Committee ken adu ti agbiahe a tumabuno iti hearing.
Impetteng ni Pimentel a saan a mabalin a maitantan ti hearing mainaig iti war on drugs gapu laeng ta awan ti presensya ti maysa a tao.
Nupay inadmitir ni Pimentel a napateg ti testimonia ni Duterte iti drug war probe, saanna a makontrol ti aramiden ti dati a presidente, nangruna ta adayo daytoy iti Manila.//BOMBO NIKKA JANE GANOY
