LAOAG CITY – Ad-adda pay a pinalawa ti Philippine National Police ti panangbiruk ken ni Kingdom of Jesus Christ Pastor Apollo Quiboloy.
Segun ken ni Philippine National Police Public Information Office chief PCol. Jean Fajardo a pinagtignayda ti tracking team iti intero a pagilian kontra ken ni Quiboloy.
Inbatad ni Fajardo, manarimaan ti validation ti tracking teams-da ti impormasion maipanggep iti posible a paglemlemmengan ni Quiboloy ken maysa pay nga akusado.
Kunana nga agtultuloy ti pannakikoordinar ti tracker team kadagiti makaam-ammo, pagayam ken pakairamanan ti organisasion ni Quiboloy tapno maammoan ti garaw daytoy.
Kinumpirmaran met ni Justice Undersecretary Jose Dominic Clavano nga adda ditoy Pilipinas pay laeng ni Quiboloy a birbiruken pay ti United States Federal Bureau of Investigation (FBI) gapu kadagiti kasona a sex trafficking.
Maipapan met iti hold departure order kontra ken ni Quiboloy, kuna ni Clavano a nangipilan ti prosekusion ti mosyon para iti daytoy.
Kagiddan daytoy, inbatad ni Fajardo a namnamaenda a mairuar iti uneg ti makalawas ti pirmado a desision ni Philippine National Police Chief Gen. Rommel Francisco Marbil iti rekomendasion ti Firearms and Explosives Office (FEO) nga ibabawi ti License to Own and Posses Firearms (LTOPF) ni Quiboloy basar iti kaso a sangsangoen a maysa a Capital Offense.
Ni Quiboloy ket adda ti tallo nga arrest warrant para iti kaso a Child ken Sexual Abuse nga inparuk-at ti Davao City Regional Trial Court ken para iti kaso nga Human Trafficking nga iniyisyu ti Pasig City Court.
