LAOAG CITY – Nag-goodluck ti presiding officer iti Sang Panlungsod kadagiti kakadwa na iti konseho ditoy ciudad ti Laoag, dua nga aldaw sakbay ti pormal a panangrugi ti kampanya para iti local positions.
Inaramid na daytoy bayat iti regular session ti Sang Panlungsod ditoy ciudad ti Laoag.
Kuna ti opisyal nga adda ti 3 a miembro nga agkalikagum a mangabak ti nangatngato a posisyon idinto a dagiti 7 a miembro ket re-electionist.
Mangnamnama nga awan ti mapasamak a panagbibinnara dagitoy a kandidato uray agduduma da ti nakikadwaan a partido.
Inbatad na a masapol kuma nga agtalinaed ti linak, urnos ken talna ditoy ciudad tapno maipakita kadagiti residente a saan a politika wenno iti posisyon ti gobierno ti mangbingay iti konseho.
Innayon na nga amin nga opisyal ken kandidato a tumaray ket ipangpangruna da ti pagsayaatan ditoy ciudad ti Laoag.
Maipalagip nga immunan a kiniddaw ti bise mayor nga apaman a mangrugi ti kampanya ket namnamaen na nga umatendar latta dagiti opisyal iti session tapno maaddaan ti quorum.
Kunana a saan da koma a liplipatan ti responsibilidad da iti agdama gapo ta dakkel ti agbalin nga epekto na no saan da nga agatendar gapo ta ado dagiti trabaho wenno ordinansa ken resolosyon para iti pagsayaatan dagiti umili a saan a maaprobaran.
