LAOAG CITY – Naiget nga inpetteng ni Senador Ronald “Bato” Dela Rosa a saan daytoy a sumuko iti animan a warrant of arrest ti International Criminal Police Organization (InterPol) manipud iti International Criminal Court iti The Hague mainaig iti kaso a crimes against humanity.
Nupay kasta, inlawlawagna a saan nga aglibas wenno rummuar ditoy pagilian.
Reaksion daytoy ni Dela Rosa kalpasan ti panangarestar ken ni Presidente Rodrigo Duterte idi Marso 11 ken alisto nga inkabilda iti The Hague a nakaibalud isuna iti International Criminal Court Detention Facility.
Sumangsango ni Duterte pakairamanan ni Dela Rosa ken dagiti sumagmamano pay nga indibidual iti kaso a crimes against humanity iti panangirubuat ti nadara a war on drugs a mapatta-patta a dumanon iti sumurok 30 a ribu pakairamanan ti vigilante killings a nairekord ti sumagmamano nga human rights organizations.
Nagserbi ni Dela Rosa kas hepe ti Philippine National Police iti panangirubuat ti Oplan Tokhang idi 2016.
Immunan nga inrakurak ti International Criminal Court nga adda pay ti siam nga akusado iti maipila nga arrest warrant ngem nakissayan daytoy ken nagtalinaed ti nagan ni Dela Rosa.
Inlawlawag ni Dela Rosa a nagdesision isuna a saan nga agpaarestar gapu ta makitana a kinaawan ti karebbengan iti administrasion ni Presidente Ferdinand “Bongbong” Marcos Jr. nga isuksukona ti asinoman a Pilipino a maipagarup nga awan ti due process-na.
Kagiddan daytoy, binabalaw ti dati nga hepe ti pulisia ni Criminal Investigation and Detection Group (CIDG) Chief Police Maj. Gen. Nicolas Torre III a nangidaulo iti panangarestar ken ni Duterte.
Naammoan a ni Torre ti nangbasa ti Miranda Rights ni Duterte idi arestaren isuna dagiti otoridad apaman a simmangpet iti Ninoy Aquino International Airport (NAIA).
Kabayatanna, inbatad met ni dati a Senate President Juan Miguel Zubiri a nasken a pinalubusan pay laeng nga umuna ni Duterte a konsultaren ti abugadona ken agisagana ti depensa sakbay nga inkabilda iti The Hague.
