LAOAG CITY – Ad-adda a pilien dagiti sumagmamano nga Overseas Filipino Workers nga agtalinaed idiay Qatar iti baet ti panangiwayat ti airstrike ti Israel.
Segun ken ni Bombo International News Correspondent Sheryl Rivera Baybayan manipud idiay Qatar, daytoy ket kalpasan a narigat a makabiruk ti napintas a trabaho ken nababa pay ti sueldo dagiti mangmangged ditoy pagilian.
Inbatadna a no agtalinaed a nabayag ditoy Pilipinas ket awan ti pangalaanda iti pangsupusop kadagiti kangrunaan a kasapulan ti pamiliana.
Inlawlawagna a nasaysayaat para kenkuana a makigasanggasat iti situasionda idiay Qatar ngem iti agawid ditoy pagilian nga awan met ti sabali a pangnamnamaanna a makatulong iti panagbiagda.
Mainaig iti daytoy, inpakaammo ni Baybayan a naruay dagiti tattao ti agpan-panic a rummuar kadagiti pagtaenganda tapno gumatang kadagiti basic commodities dagitoy.
Nupay kasta, inpetteng a business as usual wenno normal pay laeng dagiti mapaspasamak iti aglawlaw gapu ta awan met pay ti panangkanselar ti gobierno ti serrek kadagiti pagadalan wenno opisina idiay Qatar.
Innayonna nga iti uneg ti lima a tawen a nagserbi daytoy kas Overseas Filipino Worker ket daytoyen ti kapigsaan a nariknana nga airstrike ti Israel.
Immuna iti daytoy, adda dagiti sumagmamano nga indibidual a natay ken nasugatan gapu iti panangiwayat ti airstrike ti Israel.
