LAOAG CITY – Nagdidinnungpar dagiti tallo a lugan iti paset ti national highway iti Brgy. Bil-loca iti siudad ti Batac.
Segun ken ni P/Lt.Col. Adrian Gayuchan, Hepe ti Philippine National Police iti nasao a siudad, nabigbig ti driver ti Toyota Corrolla nga agmaris ti puraw a ni Mark Lester Corpuz Ibarra, naasawaan ken residente ti Brgy. Caraitan iti ili ti Badoc.
Nabigbig met ti nangiturong ti Honda CR-V nga agmaris ti blue a ni Dr. Merely Melba Matias y Naidas, agtawen iti 65, naasawaan ken residente ti Brgy. Alogoog iti ili ti Badoc idinto a nabigbig pay ti driver ti Toyota Grandia nga agmaris ti silver a ni Marc Erinel Dela Cruz y Curading, agtawen iti 32 ken residente ti Brgy. Valdez iti ili ti Marcos.
Inbatadna a basar iti insayangkatda nga imbestigasion, kabayatan a dumaldalyasat ti Toyota Corrolla nga agturong nga agpa-amianan idinto nga agpada nga agturong nga agpa-abagatan ti Honda CR-V ken Toyota Grandia ket nagdinnungar ti Toyota Corrolla ken Honda CR-V idinto a nairaman a nadungpar ti Toyota Grandia.
Inlawlawagna a gapu iti desgrasia ket sumagmamano kadagiti maseknan a nakalugan ket nagsagaba ti sugat iti nagduduma a paset iti bagida no sadino naitaray dagitoy iti Mariano Marcos Memorial Hospital and Medical Center para iti naan-anay a pannakatamingda.
Innayonna nga iti agdama ket agtultuloy ti imbestigasionda maipapan iti napasamak nga insidente.
