LAOAG CITY – Nadismaya ti importer a ni Elizabeth Panganiban, taga Manila kalpasan a nakumpiskar dagiti inpatulod na nga “imported pork skin” ditoy ciudad ti Laoag.
Inbatad ni Panganiban a regular a kliyente na ni Mr. Alfred Rambaud, maysa a negosyante idiay ili ti Paoay a nakaipatuludan ti nasao a tagilako.
Iti ekslusibo nga interview ti Bombo Radyo kenni Panganiban, inlawlawag na a gapu iti napigsa a tudo idiay Metro Manila ket nadadael ti kahon a nagyanan ti produkto, isu a nagpabiruk daytoy kadagiti empleyado na iti karton a nangiyakaran da tapno maipawit da met laeng nga insigida ditoy Ilocos Norte.
Kuna na a nakasagana a makikoordinar kadagiti otoridad iti aniaman nga imbestigasyon nga aramiden da gapu ta adda dagiti dokumento a tengtenglen da a mangipaneknek a natalged ti lako da.
Inadmitir na a gapu iti panagap-apura na a mangipatulod ti produkto ket saan nan a nasurot dagiti wagas iti pannakaipatulod ti tagilako da kas iti pannakaipasurot ti certificate manipud iti MIFF, ken ti karton a nangiyakaran na.
Innayon na a sakbay nga inpatulod da ti nasao a banag ket kinasarita na ni Rambaud no pabor a mangnayon ti bayadan na no gumatang ti napinpintas a pakaipanan ti order na imbes a ti karton gapu ta 50 percent pay laeng ti naipauna na a bayad.
Kunana pay a mismo a ni Rambaod ti nangibaga a karton lattan ti pangipanan da tapno saan a malugi daytoy.
