BOMBO LAOAG – Agtultuloy pay laeng ti imbestigasyon dagiti kameng ti Philippine National Police (PNP) iti ili ti Pinili mainaig iti napasamak a pammaltog iti Barangay Pagdilao iti nasao nga ili.
Daytoy ti inbatad ni Police Capt. Jephre Taccad, OIC ti PNP-Pinili.
Nabigbig ti biktima a ni Bienvinido Fernandez y Baniaga alyas Rambo, agtawen ti 52, awanan ti asawa ken residente iti Barangay Pagdilao ti nasao met la nga ili.
Segun ken ni Taccad, agpapan ita ket awan pay ti naestablisar da a motibo iti pannakapaltog ni Fernandez.
Inbatad ni Taccad a basar iti kabsat ti biktima, dimmalan iti operasyon ni Fernandez iti Mariano Marcos Memorial Hospital and Medical Center iti ciudad ti Batac gapu ta adda ti nadadael nga internal organ na gapu iti pannakapaltog na a nakatamaan ti bukot ken luppo na.
Maipalagip a bayat a magmagna ni Fernandez nga agawid ket ditoy a napalto-paltogan ti naminpat a daras babaen kadagiti saan pay nga am-ammo a dua a suspek.
Immun-una iti daytoy, iti kaadda ni Fernandez iti maysa a minatayan ket adda ti nagriri ngem maipagarop a nakibiang ti biktima.
Innayon ni Taccad a basar iti panagsalsaludsud da iti lugar ket naamoan da nga ugalin ti biktima ti makigulgulo isut gapuna a no agprob-probokar daytoy ket saan lattan a panpansinen dagiti tattao.
