LAOAG CITY – Saanen a maka-access dagiti tattao iti facebook idiay Papua New Guinea kalpasan nga in-block daytoy ti pagilian no sadinno nga inawagan daytoy dagiti otoridad a pannubok tapno malimitaran ti hate speech, misinformation ken pornography.
Naamoan a ti pannakaiban ti facebook iti Papua New Guinea a nangrugi idi Lunes ket nakagun-od ti kritisismo manipod iti oposisyon a kritiko ti gobierno.
Nupay kasta, inkalintegan ni Police Minister Peter Tsiamalili Jr a ti gobierno ket saanna a lapdan ti nawaya a panagirakurak ngem addaan daytoy ti responsibilidad a mangprotehir kadagiti umili manipod iti makapadakes a content.
Ti Facebook ti kalatakan a social media platform iti Papua New Guinea nga addaan ti mapatta-patta a 1.3 million users, pakairamanan dagiti babassit a negosyo nga isu iti pagdepdependaran da para iti panaglako da.
