LAOAG CITY – Kinumpirmaran ni Police Senior Inspector Rodelio Santos, chief of police iti Solsona, Ilocos Norte nga adda ti naireport kadakuada a nagsaruno a gandat a panagsibrong iti nasao nga ili babaen ti dua a van.
Inbatad na a napasamak ti immuna a gandat a panagsibrong iti asideg ti playground iti St. James Parish Church iti nasao nga ili.
Segun ti imbestigasyon da, bayat nga agay-ayam dagiti ubbing ket adda ti nagtambay a color red van ket pinaypayapayan da ti maysa na ubing a lalaki ken maipagarop nga indiayaan da pay ti biscuit.
Nupay kasta, saan a napan ti ubing gapu ta linapdan ti pada na met laeng nga ubing.
Innayon ni Santos a ti maikadwa a gandat a panagsibrong ket adda ti maysa a foton a van a color silver a maipagarop a nasardeng ken inlukat na ti ridaw na apaman a nabatog da ti magmagna a maysa manen nga ubing.
Inbatad na a nagtaray ti nasao a van kalpasan a binugkawan dagiti lallaki nga adda iti nasao a lugar.
Gapu ti daytoy, kuna ni Santos nga amin a van a sumrek iti nasao a lugar ket sitaen ken inspeksyunen da tapno malapdan ti nasao a pasamak.
