LAOAG CITY – Nagbaliktad ti maysa a trailer truck a nagkarga kadagiti construction materials ken addaan ti walo a tattao iti paset ti Barangay Baruyen iti ili ti Bangui.
Segun kenni Police Captain Julius Basallo, chief of police ti PNP-Bangui, naggapo ti truck idiay Metro Manila ken dinagas na dagiti pahinante ditoy ciudad ti Laoag ken agideliver ti landok iti Barangay Lanao iti nasao nga ili.
Inbatad na nga agsalog ken kurbaan a paset ti kalsada ken rumrumwar a nadagsen ti lugan ken napaspas ti taray na nangitunda ti panagbaliktad ti nasao a behikulo.
Iti inisyal nga imbestigasyon da, kunana a maipagarop a napukawan ti preno ti lugan no sadinno a naipit pay ti saka dagiti dadduma a biktima.
Gapo iti daytoy, naitaray dagiti biktima iti Bangui District Hospital ngem dagiti dua ket naiyakar iti Gov. Roque Ablan Senior Memorial Hospital ditoy ciudad ti Laoag.
